Bashkia e Tiranës ka përuruar parkimin publik nëntokësor, te “Bulevardi i ri”.
Parkimi nëntokësor do t’u shërbejë si atyre që vijnë në Tiranë përmes këtij aksi, edhe banorëve të zonës që frekuentojnë institucionet përreth.
Në dyvjetorin e zgjedhjes si kryetar i Bashkisë së Tiranës, Erion Veliaj vlerësoi transformimin që ka pësuar Tirana në kaq pak kohë, duke mundësuar realizimin e projekteve, të cilat deri para pak kohësh as që mund të mendoheshin.
Kryebashkiaku i Tiranës tha se ky investim, përveçse do të ndihmojë në zgjidhjen e çështjes së parkimit për shumë qytetarë, do të lehtësojë edhe trafikun e makinave, që vështirësohet shpeshherë prej parkimeve të gabuara nëpër rrugë.
Parkingu i ri nëntokësor ka 328 vende parkimi dhe ofron kushte të larta sigurie për makinat. Në të ofrohet mundësia e karikuesve për makinat që funksionojnë me energji elektrike.
