Hetimet në lidhje me vdekjen në qeli të Enver Sheshit, në ngjarjen e rëndë të ndodhur ditën e shtunë kanë nisur nga ana e policisë gjyqësore. Deri më tani janë kryer veprimet paraprake, urdhëruar ekspertimi mjeko-ligjor dhe materialet i kanë kaluar Prokurorisë së Tiranës.
Në lidhje me rastin në fjalë është aktivizuar edhe Komiteti Shqiptar Helsinkit, organizatë që mbikëqyr respektimin e të drejtave themelore të njeriut sipas konventës së ratifikuar nga Shqipëria.
Kryetarja e Komitetit, Erinda Skëndaj tha në një intervistë për Breaking në Top News se e kanë pasur të vështirë të mësojnë detaje në lidhje me vdekjen e Enver Sheshit, duke shtuar se përfaqësuesve të Komitetit u është bërë ping-pong nga institucionet.
Deklarata
“Nuk kemi arritur të marrim informacionin e plotë, që kemi ndeshur, jo vetëm për këtë rast por edhe për raste të ngjashme, kujtojmë rastin e Bilbil Hasanit në 2020. Na është komunikuar se s’mund të na jepet informacion për shkak se prokuroria është duke kryer një hetim. Ky informacion është kontradiktor me të dhënat e tjera, pasi kur kemi shkuar te prokuroria për të marrë informacion, aty kemi mësuar që prokuria nuk ka nisur as hetimet dhe s’ka as referim me kallëzim për rastin konkret. I jemi drejtuar policia a kanë nisur veprimet jemi në verifikim”, tha Skendaj
Skendaj citon standardet ndërkombëtare të të drejtave të njeriut që respektohen në të tilla raste.
“Sa herë që ndodh një humbje jete nën mbikëqyrjen e autoriteteve shtetërore, është shteti që ka detyrimin dhe barrën për të provuar se trajtimi I personit ka qenë I mirë dhe nuk ka qenë shteti fajtor me veprimet, apo mosveprimet e tij, që ka çuar në humbjen e jetës së personit”, shtoi ajo.
Në vlerësimin e Komitetit, masat e arrestit me burg duhet të jepen vetëm në rastet kur ligji parashikon se personat e arrestuar përbëjnë kërcënim për shoqërinë, për prishjen e provave, apo për t’u arratisur.
Enver Sheshi akuzohej për krijim skeme mashtrimi me TVSh, akuzë që dënohet maksimumi deri në gjashtë vite burg. Rasti i tij bëhet edhe më flagrant, nisur nga fakti që ishte marrë i pandehur për të njëjtën akuzë për të cilën ishte dënuar më parë.
