Pas një fitoreje dramatike dhe historike në transfertë ndaj Sllovakisë, kombëtarja e Kosovës ka bërë një hap gjigant drejt realizimit të ëndrrës për pjesëmarrje në Kupën e Botës 2026.
Menjëherë pas ndeshjes, kryeministri i Kosovës, Albin Kurti, ka reaguar publikisht përmes një postimi emocionues, duke përgëzuar ekipin dhe tifozët për këtë arritje të madhe.
“Urime Kosovës! Urime Dardanëve dhe gjithë shqiptarëve kudo që janë! Ky ekip me këta tifozë, sonte kanë hapur një kapitull të ri të futbollit te ne.
Loja e shkëlqyer dhe realizimet precize do të mbeten të paharrueshme përgjithmonë. Ashtu siç ëndërruam, edhe triumfuam.
Aq shumë dëshiruam, saqë fituam shumë. Kampionati Botëror kurrë s’ka qenë më afër”, ka shkruar Kurti në Facebook.
Pas këtij suksesi historik, kombëtarja dardane do të marrë një shpërblim të madh financiar nga qeveria e Kosovës.
Kryeministri i Kosovës, Albin Kurti, kohë më parë kishte premtuar 500 mijë euro në rast fitoreje ndaj Sllovakisë, ndërsa një million euro në rast kualifikimi në Botëror.
Ministri i Financave, Hekuran Murati ka konfirmuar vendimin pas triumfit 4-3 të Kombëtares së Kosovës ndaj Sllovakisë, duke thënë se Qeveria do t’i shpërblejë “Dardanët” me 500 mijë euro të hënën.
Stadiumi ‘Fadil Vokrri’ do të jetë i stërmbushur të martën, pasi që tashmë të gjitha biletat në dispozicion janë shitur.
