Një ngjarje e rëndë dhune e ndodhur në tetor të vitit 2022 në Trento të Italisë ka përfunduar në gjykatë, ku tre vëllezër shqiptarë përballen me akuza për plagosje, kërcënim dhe kundërshtim të forcave të rendit.
Sipas mediave italiane, incidenti ndodhi në zonën Gardolo, pranë Trentos, pas një debati mes pronarit të bar “Milena” dhe tre vëllezërve. Ngjarja nisi kur pronari konstatoi mungesën e energjisë elektrike në lokal dhe shkoi të kontrollonte sahatin në pallat.
Në momentin që iu hap dera, ai u sulmua nga njëri prej vëllezërve, i cili e akuzoi për muzikë të lartë. Edhe pse pronari sqaroi se lokali mbyllej në orën 20:00, konflikti u përshkallëzua, duke bërë që ai të goditej me kokë dhe të rrëzohej në tokë. Më pas, i plagosuri arriti të futet në lokal për të kërkuar ndihmë, ndërsa në vendngjarje mbërritën karabinierët.
Situata agravoi më tej kur dy vëllezërit e tjerë u bashkuan në vendngjarje dhe nisën të shkatërrojnë ambientet e lokalit. Tavolina dhe karrige u hodhën drejt xhamit, duke e thyer atë, ndërsa brenda u dëmtuan një sërë objektesh.
Përplasja vijoi edhe me forcat e rendit, ku një karabinier mbeti i plagosur, ndërsa një tjetri iu këput kablli i pajisjes taser gjatë ndërhyrjes.
Në përfundim, tre vëllezërit, banues në Trento, u arrestuan dhe tashmë po përballen me drejtësinë për veprimet e tyre. Pronari i lokalit përfundoi në spital me traumë në kokë dhe dëmtime të shumta në trup, duke marrë një raport mjekësor prej 10 ditësh.
Në seancën e fundit gjyqësore, të zhvilluar më 8 prill, avokati i tij kërkoi 70 mijë euro dëmshpërblim për dëmet fizike dhe materiale, ndërsa çështja është shtyrë për një vlerësim më të detajuar.
