Ajo e dha të bijën për birësim kur e vogla ishte 1 vjeçe e disa muaj. Fëmija u mor nga një çift anglez në vitin 1993, ndërsa në atë kohë, Besikoja nga Kuçova dhe i shoqi i saj, iu kërkuan çiftit anglez që herë pas here t’iu dërgonin foto e video të vajzës.
Situata ishte normale deri në vitin 1997, kohë kur Besikoja dhe familja e saj humbën kontaktin me çiftin anglez dhe nuk dëgjuan më asnjë gjë për të bijën.
Mes lotësh, duke kujtuar skamjen, vuajtjen dhe dhimbjen e asaj periudhe, çka e detyroi në dhënien e fëmijës tek çifti i huaj, Besikoja tregon momentin kur u nda nga e bija, vetëm një vjeçe e disa muajshe.
“E mbaja në krahë dhe momentin e fundit që e lëshova, më kapi në dorë, tha “Mama”. Më kapi fort. Nuk ecte në këmbë se ishte ende e vogël. Kam 6 fëmijë bashkë me atë vajzë. Kam të njëjtën shtëpi që kur ka ikur vajza. Jetoj në të njëjtin vend në varfëri” – tha Besikoja në emisionin “Me zemër të hapur”.
Ajo shprehet se fillimisht çifti anglez iu premtoi se do merrnin vajzën dhe më pas do të merrnin dhe pjesën tjetër të familjes.
“Në gjendjen civile, vajza ekziston ende e regjistruar në trungun tonë familjar” – tregon Besikoja.
