Ish-ministri dhe ish-deputeti i PD-së Arben Imami, një emër mes të rikthyerve në PD ka mbajtur një fjalim në Kuvendin Kombëtar të PD-së duke thënë se PD u ndodh në një krizë përfaqësimi.
Në fjalën e tij, Imami pati një vërejtje për të mos mbetur me formulimet “të rinj dhe të vjetër” duke akuzuar kryeministrin Edi Rama dhe ish-kreun e PD Lulzim Basha për ndërmarrje të përbashkët për përjashtimin e Sali Berishës në shtator 2021.
“Ajo që ndodhi në partinë tonë, ishte krizë e përfaqësimit, ish-kryetari në shkelje të statutit bënë spastrimin e partisë në të gjitha nivelet. Zgjedhjet e kontrolluara, të manipuluara, të falsifikuara për kryetarin e partisë më 2017 dhe 2021 pas dështimeve të turpshme, ishin një turp. Partia duhet të jetë e hapur. Sa më të rinj të jenë, aq më mirë për të ardhmen e kësaj partie. Por edhe një vërejtje të mos mbetemi me formulimet e vjetra, të rinj dhe të vjetër. Këto ishin parullat e OJQ-ve post dhe pro komuniste të para 20 vjetëve, kur thoshin Nano dhe Berisha duhet të ikin se e kanë kaluar moshën. Këta u plakën, por mbetën Piter Pan si kryeministra e kryetarë partie, këta të tjerët Rama, Basha e kompani. Qëllimi ishte të eliminonin drejtuesit politik, gjë që me qëllimin më të keq pas vitit 2013 u adaptua dhe në PD, me një fushatë shpifjesh dhe denigrimesh të stilit Rama-Basha deri në kurorëzimin e ndërmarrjes së tyre të përbashkët, me përjashtimin e Sali Berishës në shtator 2021”, deklaroi Imami.
