Drejtori i Mjedisit në IKMT, Klesti Çela është shpallur në kërkim pasi dhunoi në zyrë me qytën e pistoletës Fatmir Metën, drejtorin e Ekzekutimit të Vendimeve në Inspektoratin Kombëtar të Mbrojtjes së Territorit.
Klesti Çela, kunati i Ergys Agasit, akuzohet se së bashku me tre persona të tjerë të paidentifikuar kanë goditur Fatmir Metën në institucion.
“Specialistët për Hetimin e Krimeve të Komisariatit të Policisë Nr. 2 shpallën në kërkim shtetasin Klesti Çela, pasi dyshohet se dje, së bashku me 3 shtetas ende të paidentifikuar, ka goditur për shkak të detyrës shtetasin Meta, drejtor i Drejtorisë së Ekzekutimit të Vendimeve të IKMT-së, në ambientet e këtij institucioni. Punohet për sqarimin e plotë të rrethanave të rastit.”, njofton policia.
Burimet bënë me dije se përplasja brenda institucionit kishte të bënte me konflikt që lidhet me një grup inspektimi për çështjen e depozitimit të dherave. Debati fillestar ka nisur verbalisht mes Metës dhe Çelës dhe një ditë më pas, situata ka degraduar në dhunë fizike me qytën e pistoletës.
Fatmir Meta është drejtuesi i IKMT që ka shembur shumë objekte, së fundmi ka drejtuar aksionin e prishjes së ndërtesave turistike në Theth, ku nuk munguan përplasjet me molotov me banorët e zonës.
Pas ngjarjes, Kreu i Inspektorati Kombëtar i Mbrojtjes së Territorit, Afrim Qëndro shkarkoi nga detyra Klesti Çelën dhe Ervin Bixhen, që mbante postin e këshilltarit pranë kryeinspektorit. Qendro shkarkoi dhe Bixhën, i cili është vëllai i Elgert Bixhës, emër i lidhur me Ergys Agasin, biznesmenin e shpallur në kërkim nga SPAK për skandalin dhe aferat me AKSHIN.
