Një shtetas grek është bllokuar në Rinas pasi gjatë kontrollit iu gjet një pajisje që dyshohet se kryen përgjime.
Policia bën me dije se shtetasi është Iraklis Dragounis, 52 vjeç i cili banon në Greqi, dhe ka detyrë inxhinier ndërtimi. Mësohet se pasaporta e tij është bllokuar deri në sqarimin e plotë të rrethanave të futjes në vendin tonë të pajisjes së dyshimtë.
Dragunis nuk pranoi të jepte shpjegime në lidhje me pajisjen, por pohoi se ai kishte punuar në Tiranë për llogari të një kompanie shqiptare të telefonisë celulare. I ndaluari tha se me këtë pajisje kishte kontrolluar cilësinë e sinjalit të antenave celulare.
Ky është rasti i dytë i ndalimit të një shtetasi të huaj në aeroportin e Rinasit me pajisje të dyshimtë, pas izraelitit Yoram Frig.
