Detaje të reja janë zbardhur lidhur me ngjarjen që ndodhi në ambientet e spitalit Nënë Tereza në Tiranë, ku si pasojë e një avarie në ashensor, mbetën të lënduar një paciente dhe një punonjës i kujdesit shëndetësor.
Incidenti ndodhi në katin -1 teksa një paciente 80-vjeçare po transportohej nga barrielisiti, ndërkohë që të dy kanë pësuar lëndime. Mësohet se pacientja ka pësuar disa plagë në kokë, për shkak të tronditjes së ashensorit.
Të dy personat kanë qëndruar të bllokuar për 5 minuta, ndërsa pas ndërhyrjes së forcave të Shërbimit zjarrfikës u bë e mundur hapja me forcë e derës së ashensorit.
Mësohet se 80-vjeçarja është transportuar për në spitalin e Traumës, ndërsa ndodhet jashtë rrezikut për jetën. Ndërkohë, tekniku i ashensorit pohoi para oficerëve të policisë se ishin kryer të gjitha kontrollet dhe se nuk ka pasur avari në këtë ashensor, megjithëse pritet ekspertiza.
