Nuk ka zgjatur më shumë se 6 muaj “shkëlqimi” i investimeve fasadë të kryebashkiakut të Tiranës, Erion Veliaj në pallatin e Sportit “Farie Hoti”. Pas inaugurimit me zhurmë të ambienteve të reja të sallës së sportit, “Farie Hoti” është rikthyer në gjendjen e mëparshme.
Në pamjet e siguruara nga Gijotina.com duket qartë se salla e lojërave me dorë nuk është më funksionale. Pallati i sportit ka degraduar, ndërsa suvaja e tavanit ka rënë mbi parket.
Gjatë ceremonisë së inaugurimit, Veliaj e cilësoi transformimin si cilësor por rrënimi i ambientëve të pallatit të sportit flet vetë.
“A është i vërtetë ky transformim? A është i vërtetë ky investim kaq cilësor për klubin më prestigjioz të Republikës së Shqipërisë, i denjë sa rreshti i kupave dhe i medaljeve? Më në fund mund të themi Po. Unë besoj se edhe fryma e këtij klubi, e këtyre skuadrave, është inkurajimi, të jemi mbështetës dhe motivues. T’i themi njëri – tjetrit: “Faleminderit”! “Jam krenar për ty!”, tha Veliaj.
Rënia e suvasë ka bërë që të merren masat, me klubin bardheblu që është kujdesur të heqë gjithë pjesën e tavanit, për të shmangur ndonjë tragjedi të mundshme. Sportistët e Klubit Shumësportësh Tirana që do duhet të qëndrojnë larg ambienteve edhe për disa kohë.
