Mjeku i urgjencës së QSUT, Petrit Gjorgji u dhunua dje nga një i afërm i një pacienti gjatë orarit të punës. Policia ka arrestuar 24-vjeçarin me iniciale L. B. pasi goditi mjekun.
Mjeku Petrit Gjorgji ka treguar si ndodhi incidenti. Ai thotë se kishin një pacient me probleme me veshkat, ndërsa për një moment ka rënë nga krevati. Gjormi shpjegon se me ndihmën e kolegëve janë munduar ta ngrenë.
“Kishim një pacient për veshkat. Në një moment ka rënë nga krevati dhe me ndihmën e kolegëve të tjerë kemi shkuar për ta ndihmuar. Për ta ngritur, unë e kapa jo të gjithë trupin, por nga këmbë, për shkak të pozicionit dhe e vendosëm sërish në krevat. Një i afërm, që nuk po i shërbente e pa dhe ka ardhur më ka goditur nga pas. Ndërhynë mjekët dhe infermierët. Denoncova dhe erdhi policia që e ka marrë. Është rast i përsëritur për mua. Më ka ndodhur edhe në vitin 2004. Kjo nuk mund të ndodhë me bluzat e bardha. Unë do e ndjek çështjen, duhet të bëhet drejtësi”, u shpreh mjeku.
