Fajton Marku trafikanti i cili u arrestua sot në flagrancë nga policia e Lezhës, do të vuajë dënimin me 14 vite burg pasi ishte përfshirë në trafikun e laboratorit të heroinës që u zbulua në Has në 18 tetor të 4 viteve më parë. Marku u dënua nga GJKKO me 14 vite burg në 2018. Pjesë e dosjes 339 janë edhe Avdylajt. Altin Avdyli u arrestua në vitin 2018 gjatë operacionit “Volvo 4” për laboratorin e kokainës që u gjet ne Has. Gjatë hetimit të SPAK rezultoi se Astrit Balliu (Avdyli) dhe personat e tjerë merreshin me trafikimin e sasive të madhe të lëndëve narkotike nga Shqipëria në drejtim të Italisë dhe vendeve të tjera Evropiane.
Operacioni “Vol-vo 4”
Më 21 tetor të vitit 2018 nga autoritet ligjzbatuese u finalizua operacioni i koduar “Vol-vo 4”, ku u goditën katër grupe kriminale, mes tyre dhe Avdylajt e Shijakut. Operacion i zhvilluar në 12 qytete, nga Hasi në Sarandë. Në kuadër të këtij operacioni u gjet një laborator heroine në Brengosë të Hasit, Kukës. Në laborator policia sekuestroi 182.5 kg morfinë, e ndarë në 175 pako, 22 litra lëndë e lëngshme, të cilat përdoreshin për prodhimin e heroinës. Laboratori u zbulua nga përgjimet e Gj.Ndokës, si i lidhur me grupin e Avdylajve. Gjatë operacionit “Vol-vo 4” u arrestuan 63 persona të akuzuar për vepra të ndryshme penale. Të pandehur për trafik droge u morën 22 persona, ndërsa pjesa tjetër akuzohen për tjetërsim pronash, shpërdorim detyre, apo manipulim të zgjedhjeve. Dosja voluminoze “339” është e ndarë në disa nënçështje. Hetimet nisën në dhjetor 2016 pas arrestimit të 3 personave në Kavajë, tashmë të dënuar për trafik heroine. Ata trafikonin kokainë dhe heroinë nga Kolumbia dhe Turqia për ta shpërndarë në Europë ku dërgonin edhe kanabis. Grupit “Avdylaj” me degë në Durrës, Lezhë, Fier e Sarandë, në shkurt të 2017 i është kapur në Itali një dërgesë me 2 ton kanabis. Pas hetimeve janë sekuestruar dhe konfiskuar, pasuri të paluajtshme truall në bregdet me sipërfaqe 300 mijë m2, e cila ka qenë pronë shtetërore e përfituar në mënyrë të paligjshme nga anëtarët e grupit kriminal.
