Ka marrë fund aventura e 21-vjeçari Kristjan Medolli, i cili ditën e sotme u arratis me pranga nga Gjykata e Korçës pasi kjo e fundit vendosi ta lërë në burg. Mësohet se i riu është arrestuar vetëm pak orë pas arratisjes nga Gjykata.
Sipas njoftimit të policisë, ai u kap duke u fshehur në afërsi të azilit të Korçës, afër kishës së Shën Thanasit, i futur nëpër ferra e shkurre. Ai ishte arrestuar për vjedhje të një banese, vepër për të cilën u dënua me burg.
“Në vijim të informacionit paraprak të ditës së sotme, i cili bënte fjalë për largimin nga Gjykata e Rrethit Gjyqësor Korçë e shtetasit K. M., (i arrestuar më parë për vjedhje) ju informojmë se falë veprimeve të shpejta, nga ana e shërbimeve të Komisariatit të Policisë Korçë, u bë e mundur kapja e këtij shtetasi në afërsi të kodrave të qytetit të Korçës dhe shoqërimi i tij, për veprime të mëtejshme procedurale”, njofton policia.
