Deputetja e Partisë Demokratike, Greta Bardeli ka deklaruar qartë se nuk ka firmosur për të mbështetur platformën e propozuar nga kreu i grupit parlamentar, Enkelejd Alibeaj në përpjekje për të bashkuar partinë dhe ulur tensionet në selinë blu.
Përmes një postimi në Facebook, Bardeli i ka konsideruar si qesharake lajmet se ajo ka firmosur platformën por më pas është bërë “pishman”, duke thënë se ajo nuk ka hedhur asnjëherë firmë dhe kërkon mbledhjen sa më shpejt të grupit parlamentar demokrat që qëndrimi i saj të dëgjohet.
“Një sqarim për një lojë fjalësh që është përhap në disa media sot për gjoja përfaqësues te PD që kanë firmos draftin dhe që më pas u bënë “pishman” duke përdor në këtë rast emrin tim si deputete!! Më vjen keq ta them, por është qesharak ky lajm nga fillimi në fund! Lidhur me sajesa të tilla që i konsideroj “të lodhura” i sugjeroj mediave që për çdo sqarim mund të më kontaktojnë nëse kanë nevojë, që mos këtë keqinformim të këtij lloji nga kushdo që i shpërndan apo më keq akoma botohen pa pasur fakt. Është e qartë që firmë nga ana ime nuk ka dhe nuk ka pasur përsa kohë nuk përputhet me qëndrimin tim që tashmë është publik. Deklarata është publike në FB tim drejtuar demokratëve dhe bashkëqytetarëve në Shkodër. Për më tej kërkoj sa më parë mbledhje të grupit parlamentar të PD për tu dëgjuar qëndrimi im dhe i gjithë kolegeve tanë pa përjashtim”, shkruan Bardeli.
Kujtojmë se, Bardeli ishte në listën e 32 deputetëve që Enkelejd Alibeaj iu lexoi emrat duke thënë se kanë mbështetur platformën e tij, por deputetja ka reaguar duke e nxjerrë blof këtë të fundit.
