Turqia ka kryer sulme ajrore kundër shënjestrave të rebelëve kurdë në veri të Irakut, pas sulmit të djeshëm në Ankara.
Ushtria turke përmes një deklarate të lëshuar sot, tha se aeroplanët luftarakë kanë goditur depot e armëve dhe strehimoret e pjesëtarëve të Partisë së Punëtorëve të Kurdistanit, në rajonet Kandil dhe Gara, në veri të Irakut.
Sulmet ajrore vijnë disa orë pasi 37 njerëz mbetën të vrarë dhe 120 të tjerë u plagosën nga një shpërthim i fuqishëm mbrëmjen e djeshme në Ankara.
Ministri turk i Shëndetësisë, Mehmet Muezzinoglu, dha sot shifrat e reja gjatë një prononcimi televiziv, duke theksuar se tre njerëz të tjerë kanë ndërruar jetë, për shkak të plagëve të rënda.
Ai shtoi se të paktën njëri nga sulmuesit është llogaritur në shifrën e personave të vdekur.
