Kryevepra e dramaturgut rus, Anton Çehov, ngjitet për herë të parë në skenën e Teatrit Kombëtar 115 vjet pasi u shkrua dhe u vu në skenë në Teatrin e Arteve të Moskës.
Kjo shfaqje sjell përditshmërinë e jetës me trishtimet, drama, dashuritë dhe Çehovi në këtë vepër i ngjan shoqërisë shqiptare falë universalitetit të krijimit.
Regjisori Hervin Çuli, sjell një autor si “Çehovi, që mbetet i vërtetë si jeta”. Në një koncept regjisorial të hapësirës dhe ngushtësisë, të kohës dhe pakohës, të plotësisë dhe hiçit, “Tri Motrat” prezantohet për publikun në një skenografi që e tejkalon skenën dhe zbret në sallë, aty ku personazhet-aktorë frymojnë pranë publikut.
Komedia, apo drama e trishtuar me elementë komedie rrëfen jetët e tri motrave Prozorov. Olga, Masha dhe Irina digjen nga dëshira për t’i ikur qytetit të vogël rus dhe të kthehen në Moskën ku janë rritur. Ata që hyjnë në orbitën melankolike të tri grave janë ushtarakët si Doktor Çebutikin dhe kolonel Vershinin, të cilët janë aty më shumë për t’ia vështirësuar jetët motrave, veçanërisht kur Masha dhe Vershinin nisin një lidhje të palogjikshme.
Në skenë me këtë vepër që hap edhe siparin e sezonit të teatror në Teatrin Kombëtar ngjiten emra të njohur si Bujar Asqeriu, Elia Zaharia, Neritan Liçaj, Anila Bisha, Gert Ferra, Helidon Fino, Gladiola Harizaj, etj.
Në repertorin e TK rikthehen dublantët. Shfaqjes “Tri Motrat” do i bashkohen edhe dublantët për rolet kryesore, duke sjellë një pjesëmarrje të trupës kombëtare, që shkon deri në njëzet aktorë.
Gjatë shfaqjes është menduar të ketë edhe një pushim në mes, për herë të parë në një vepër skenike që zgjat rreth 4 orë.
Regjia: Hervin Çuli; Skenografia : Kiço Çala; Kostumografe: Berina Kokona; Koreografe: Kozeta Bakiu
Interpretojnë aktorët : Flaura Kureta- Anila Bisha; Gladiola Harizi- Erjona Kakeli; Elia Zaharia; Indrit Çobani- Lulzim Zeqja; Olta Gixhari- Ina Gjonçi; Naum Shundi; Helidon Fino; Neritan Liçaj; Gerti Ferra; Bujar Asqeriu; Reael Hoxha; Genti Deçka; Mehdi Malkaj; Natasha Sela.
