Drejtori i Përgjithshëm i Policisë së Burgjeve Enrik Sulejmani është shkarkuar nga detyra.
Mësohet se shkarkimi i kreut të policisë së Burgjeve ka ndodhur për çështjen e Ervis Martinaj. Policia e Burgjeve nuk arriti ta marrë Martinaj nga spitali Amerikan 2 ku ndodhej i shtruar për shkak të plagëve që ka marrë në ngjarjen e 4 tetorit në Bllok.
Ndërkohë Ministria e Drejtësisë jep detaje për largimin e Sulejmanit nga detyra dhe përplasjen e ditës së kaluar për transferimin e Elvis Martinajt në spitalin e Burgut.
Në deklaratën shpërndarë mediave thuhet se Ministrja e Drejtësisë ka aprovuar propozimin e Drejtorit të Përgjithshëm të Burgjeve për largimin nga detyra të Drejtorit të Policisë së Burgjeve, Enrik Sulejmani me motivacionin “Për mospërmbushje të detyrave funksionale”.
“Ky vendim është marrë për shkak të mosekzekutimit të vendimit nr.1878, datë 07.10.2018 të Gjykatës së Rrethit Gjyqësor Tiranë për vendosjen e masën së sigurimit “arrest me burg” për shtetasin Elvis Martinaj. Ky shtetas për shkak të gjendjes shëndetësore ishte akomoduar në ambientet e Spitalit Amerikan. Për moszbatim të vendimit të gjykatës me masën e sigurisë ‘arrest në burg’ për Martinaj, është kryer shkarkimi i Drejtorit të Policisë së Burgjeve, Enrik Sulejmani, me motivacionin e mospërmbushjes së detyrave funksionale sipas ligjit në fuqi.Shtetasi Elvis Martinaj është shoqëruar në mjediset e Qendrës Spitalore të Burgjeve vetëm në mbrëmjen e datës 9 tetor. Qeveria Shqiptare siguron çdo qytetar se ligji është i barabartë për të gjithë dhe kushdo që bëhet pengesë për zbatimin e tij do të marrë përgjigje shembullore.” perfundon deklarata e ministrise.
