Siguria e ashensorëve në ndërtesat shumëkatëshe është bërë në jo pak raste shkak shqetësimi dhe alarmi kjo sigurisht kur ka pasur episode problematikë që në disa raste kanë përfunduar edhe në fatalitet. Për rritjen e sigurisë në vitin 2021 nisi edhe puna për regjistrin ku të dhënat zyrtare tregojnë se ka pasur disa qindra ashensorë të regjistruar. Inspektorati Shtetëror i Mbikëqyrjes së Tregut raporton se vitin e shkuar inspektimet e bëra për ashensorët kanë vijuar dhe janë marrë edhe disa dhjeta masa administrative ndaj shkelësve të ligjit.
“Gjatë vitit 2021 janë kryer 336 inspektime të subjekteve që kanë në përdorim ashensorë, apo vendosin në treg (instalojnë apo importojnë) ashensorë dhe komponentët e sigurisë për ta. Janë marrë në total 95 masa administrative nga të cilat 32 gjoba dhe 61 paralajmërime dhe 2(dy) masa urgjente.
Në kuadrin e ngritjes së Regjistrit kombëtar të ashensorëve, gjatë vitit 2021 janë regjistruar 647 ashensorë” raportoi Inspektorati. Ky i fundit bëri me dije se në total për produktet mekanike janë kryer 345 inspektime nga të cilat 28 jashtë programit mbi bazë ankimi.
“Janë realizuar 28 inspektime ku janë kontrolluar rreth 310 produkte për përmbushjen detyrimit të markimit CE si edhe Deklaratës së Konformitetit sipas Ligjit Nr.10 489, datë 15.12.2011 “Për tregtimin dhe mbikëqyrjen e tregut të produkteve joushqinmore”, i ndryshuar. Nga këto janë konstatuar 5 produkte jo në konformitet dhe si rezultat janë vendosur 6 masa administrative gjobë.
Subjektet gjithashtu u këshilluan për detyrimet ligjore që duhet të përmbushin në lidhje me këto produkte.Janë kryer 2 inspektime të subjekteve që vendosin në treg makineri. Nuk është marrë asnjë masë administrative” thuhet në raportin përmbledhës të aktivitetit të Inspektoratit./MONITOR
