Në një dalje për mediat, kryedemokrati Sali Berisha është shprehur se janë zhdukur të gjitha filmimet nga ngjarja tragjike në Himarë. Berisha, tha gjithashtu se pronari i skafit “vrasës” që i mori jetën vogëlushes Jonada Avdia, ka lidhje të ngushtë me Taulant Ballën.
Kryedemokrati tha se polici Arjan Tase, pas pezullimit u rikthye në detyrë falë lidhjes së tij me dy ministrat e Ramës, Bledi Çuçin dhe Taulant Ballën.
“Skafi ishte i Adhurim Kushit, një nga çunat e Taulant Ballës në Angli. Pra, e kuptoni vetë origjinën e skafit. Adhurim Kushi punon akoma në Britani dhe blen skaf.
Autori jo vetëm tentoi të largohet, por janë zhdukur kamerat që kanë filmuar skenën e aksidentit. Qytetarët janë të revoltuar. Nuk mund ta kapërcejë Edi Rama me halucinacione. Arjan Tase, me origjinë nga Përmeti, u rikthye në detyrë nga dy ministrat.
Ai nuk plotësonte asnjë kusht, përveç lidhjeve të forta me dy ministrat. Të dhënat tjera janë shumë tronditëse. Ministri i Brendshëm apo ministri i familjes, rezulton të jetë anëtar i një shoqate të mbushur me trafikantë dhe kontrabandistë, për të cilët media ka nxjerrë emra dhe fakte.”
