Gjykata e Apelit në Shkodër ka vendosur për ish kryetarin e Bashkisë së Lezhës Fran Frrokaj dhe ish kryetarin e qarkut dhe xhaxhin e ish deputetit të PS, Gjok Ndoka, mbi tjetërsimin e 66 mijë metrave katrorë tokë në bregdet.
Së bashku me ta, janë vënë nën akuzën e “Shpërdorimit të detyrës” dhe 8 ish zyrtarë të tjerë vendorë, kryesisht nga zyra e regjistrimit të pasurive, si dhe një person tjetër, Altin Mija, që është përfitues i tokave të tjetërsuara, vlera e të cilave përllogaritet në 13 milionë euro.
Gijotina.com ka siguruar dokumentin e vendimit të Gjykatës së Apelit në Shkodër, sipas të cilës tregohet se xhaxhai i ish- deputetit të PS, Gjok Ndoka është dënuar me 3 vite burg për “falsifikim dokumentesh” ndërsa është pushuar procedimi penal për “shpërdorim detyre”. Ish-kryebashkiaku i Lezhës, Fran Frrokaj është dënuar me 3 vite burg për veprën penale të “Shpërdorim i detyrës”.
Gjykata e Apelit ka vendosur edhe për ish-zyrtarët e tjerë të përfshirë në këtë veprimtari të jashtëligjshme, kryesisht nga zyra e rregjistrimit të pasurive.
-Ardenis Haxhia ka përfituar nga ulja e dënimit duke mbetur përfundimisht 1 vit burgim;
-Juxhina Mema është dënuar me 2 vite burg, duke përfituar nga ulja e dënimit, me akuzën për vepën penale “Shpërdorim detyre”;
-Për Renato Malotaj Apeli në Shkodër ka vendosur 6 muaj burgim me akuzën për veprën penale “Falsifikim i dokumenteve”;
-Të pandehur janë marrë edhe Artan Daja, Ermando Jakaj dhe Bledar Cara nën akuzën për veprën penale “Shpërdorim detyre”.
Hetimi
Hetimi ka nisur në vitin 2019 dhe sipas prokurorisë “veprimtaria e kundraligjshme ka filluar me përcaktimin e parcelës, e cila është me pronësi shtet, gjetjen e personave të interesuar për t’u pajisur me tokë, falsifikimin e dokumenteve të pronësisë që nga origjina e pronës deri tek çertifikata e pronësisë. Në këtë veprimtari kriminale, personat përfitues në mënyrë të kudnraligjshme të pronave kanë përfshirë edhe persona të tjerë, ndër ta persona të afërt dhe të njohur më ta, duke ja kaluar në mënyrë fiktive pasuritë dhe më pas me qëllim final për t’i kaluar në pronësinë e tyre”.
Dy ish drejtuesit më të lartë të pushtetit vendor në Lezhë, Frrokaj dhe Ndoka, si dhe ish zyrtarë të tjerë, u arrestuan në vitin 2018, për tjetërsimin e mbi 230 mijë metrash katrorë të tjera po në bregdet. Ata u lanë më pas të lirë, ndërsa Gjykata e Apelit vendosi dënimin me burg për ta.
