Autoritetet italiane kanë bërë me dije se 22 persona kanë humbur jetën në ujrat e detit Mesdhe në përpjekje për të mbërritur në Europën perëndimore.
Ndryshe nga shumica dërrmuese e rasteve, viktimat që ishin 21 gra dhe një burrë, nuk janë mbytur në det, por kanë mbetur të bllokuar në një hapsirë në brendësi të mjetit lundrues, e cila për arsye që ende nuk dihen është mbushur me ujë dhe lëndë djegëse.
Trupat e pajetë të viktimave kanë qëndruar në kushte të tilla për disa ditë me rradhë, deri sa rojat bregdetare arritën që të zbulonin mjetin lundrues. Ndërkohë, falë ndërhyrjes së tyre, është bërë i mundur shpëtimi i 200 personave të tjerë, mes të cilëve edhe i 50 fëmijëve.
Ndërkohë, në një prononcim të bërë për mediat, Agjensia e refugjatëve ka bërë me dije se që nga fillimi i vitit e deri më tani, 3000 emigrantë kanë humbur jetën në përpjekjet e tyre për të mbërritur në Europë përmes detit Mesdhe, duke vendosur kështu një rekord tragjik. Agjensia njofton gjitahshtu se kjo shifër ësthë dy herë me e lartë, krahasuar me të njëjtën përiudhë të një viti më parë.
Ndikuar nga mbyllja e kufinjve në vendet ballkanike, në Europë është ulur ndjeshëm numri i emigrantëve që vijnë nga Lindja e Mesme. Megjithatë, në kontinentin e vjetër po mbërrijnë cdo ditë mijëra azil-kërkues nga Afrika Veriore e kryesisht nga Libia. Autoritetet japin alarmin se mjetet lundruese që përdoren nga refugjatët janë të vjetra dhe shpesh herë tejmbushen me pasagjerë gjë që rrit rrezikun e fundosjes së tyre.
