Një sasi prej 1 kg e 50 gramë kokainë është sekuestruar nga policia e Tiranës mbrëmjen e djeshme, që ka arrestuar dy persona.
Të arrestuarit janë Klajdi Serjani, 24 vjeç, dhe Xhenjo Manushi, 20 vjeç, të dy banues në Tiranë. Sipas policisë, ata ishin të angazhuar në aktivitetin e paligjshëm të trafikut të drogës.
Lënda narkotike, sipas bluve, kap një vlerë tregu prej 270 000 euro përmes shitjes në doza të vogla.
Arrestimi
Aksioni i koduar “Fam Fanz” nga efektivët e Sektorit për Hetimin e Narkotikëve në DVPT në bashkëpunim me prokurorinë e rrethit u zhvillua me metoda proaktive, thanë burime zyrtare nga policia e Tiranës.
“Shërbimet e Policisë kanë lokalizuar në rrugën ‘Kastriotët’, automjetin me drejtues shtetasin K.S., dhe pasagjer shtetasin E.M. Gjatë kontrollit fizik të shtetasit K.S., shërbimet e Policisë i gjetën 1 kg e 50 gramë lëndë të dyshuar narkotike kokainë”, njoftoi policia, që shpërndau edhe një video me pamje nga momentet e ndalimit.
Lënda narkotike, së bashku me një shumë parash dhe celularët e shtetasve të arrestuar, u sekuestruan në cilësinë e provës materiale, shtuan të njëjtat burime.
Sipas burimeve policore, dy të rinjtë janë ndjekur dhe janë mbajtur nën përgjim nga efektivët për të paktën 6 muajsh. Kryesisht, ata e shpërndanin kokainën në zonën e ish-Parkut, por dhe në zona të tjera të Tiranës, shtuan të njëjtat burime.
Një nga të arrestuarit, nipi i Pajtim Serjanit
Një nga të arrestuarit, Klajdi Serjani, i cili reklamonte një jetë luksi në rrjetet sociale, është nipi i Pajtim Serjani, një emër i njohur në raportimet e kronikës së zezë.
Pajtim Serjani është arrestuar dhe dënuar për gjobëvënie me tre vite, ndërsa aktualisht është i lirë, pasi e ka përfunduar dënimin.
Serjani u dënua për gjobëvënie ndaj një biznesmeni në vitin 2014. Në vitin 2015 Serjanit i është bërë atentat të Rruga e Kavajës, ndërsa lidhur me këtë ngjarje asokohe u arrestuan Aurel dhe Amarildo Hoxhallari.
Serjani lëvizte në Tiranë me makina të blinduara ndërkohë që është etiketuar edhe si miku i Emiljano Shullazit. Në shtator 2017, policia i sekuestroi Serjanit katër makina të blinduara më vlerë 1 milion euro. Tre prej makinave rezultuan të trafikuara nga vendet e BE, njëra prej të cilave me targa të falsifikuara.
I arrestuari tjetër, djali i muzikantit “Adi Sybardhi”
Ndërsa i arrestuari tjetër Euxhenjo Manushi, është djali i muzikantit të njohur si Adi Sybardhi.
20-vjeçari Manushi ishte pasagjer në mjetin që drejtohej nga Serjani, ku u gjet dhe droga.
Vetë muzikanti Sybardhi, ka reaguar në Facebook duke postuar foton e të birit me fjalët: “Allahu te begatoftë shpirti babit”.
