Një e re është gjetur e pajetë në një banesë në kryeqytet, këtë të enjte. Hetimet paraprake kanë zbuluar se në trupin e viktimës janë konstatuar plagë që dyshohet se janë shkaktuar me mjet prerës, c’ka shton dyshimet se vajza është vrarë.
Në një njoftim për mediat, policia thotë se nuk i ka përcaktuar ende gjeneralitet e viktimës, e cila dyshohet se është shtetase e huaj.
Ajo është gjetur e vdekur në banesën që kishte marrë me qera në rrugën “Gjon Muzaka” (mes Rrugës së Durrësit dhe asaj të Kavajës).
“Rreth orës 12:55, në rrugën ‘Gjon Muzaka’, është gjetur pa shenja jete në banesën që kishte marrë me qira, një shtetase (dyshohet e huaj), rreth 30 vjeçe. Gjatë këqyrjes paraprake të trupit janë konstatuar plagë që dyshohet se janë shkaktuar me mjet prerës”, tha policia në një njoftim paraprak.
Trupi i pajetë, shtuan të njëjtat burime, do t’i nënshtrohet ekspertizës mjekoligjore.
Grupi hetimor po punon për identifikimin e kësaj shtetaseje, sqarimin e rrethanave dhe dokumentimin ligjor të rastit, mbyllet njoftimi i bluve.
Ndërkaq, burime pranë grupit hetimor thanë se ka dyshime që viktima të jetë vrarë disa ditë më parë.
