Një aksident i rëndë në punë i ka marrë jetën një hidrauliku, i cili ra nga një lartësi e konsiderueshme gjatë punimeve në një kantier ndërtimi ne Paskuqan. Ngjarja ndodhi gjatë orarit të punës, teksa viktima po kryente detyrat e tij profesionale.
Sipas njoftimit paraprak të policisë, i dëmtuari u dërgua me urgjencë drejt spitalit, por nuk arriti t’u mbijetojë plagëve të marra dhe ndërroi jetë pak më vonë.
Në vijim të veprimeve hetimore, autoritetet arrestuan në flagrancë administratorin e firmës ndërtuese, nën dyshimet për shkelje të rregullave të mbrojtjes në punë dhe mosrespektim të kushteve të sigurisë teknike në kantier.
Grupi hetimor po vijon punën për të zbardhur plotësisht rrethanat e aksidentit, ndërsa pritet ekspertiza teknike që do të përcaktojë nëse janë zbatuar standardet ligjore të sigurisë për punëtorët.
Njoftimi i Policisë:
Në orën 18:00, specialistët për Hetimin e Krimeve në Komisariatin e Policisë Nr. 5 arrestuan në flagrancë shtetasin A. M., 61 vjeç, me detyrë administrator i firmës nënkontraktore, pasi rreth orës 10:30, të ditës së sotme, në Paskuqan 1, gjatë punës, ka rënë nga lartësia shtetasi H. P., 64 vjeç (punëtor për punime hidraulike), i cili si pasojë ka humbur jetën.
Materialet procedurale iu referuan Prokurorisë së Tiranës për veprime të mëtejshme.
gijotina.com/
