Nic Haros Jr., djali i njërës prej viktimave të 11 shtatorit 2001, i bëri thirrje Presidentit Biden ta shmangte pjesëmarrjen në ceremoninë për 20-vjetorin e sulmit në Kullat Binjake.
Gjatë një interviste në FoxNews dje, Haros Jr. e quajti Bidenin ‘kryevrasës’ duke thënë se ai shfaqi shumë pak dhembshuri për familjet e 13 anëtarëve të personelit amerikan të vrarë në aeroportin e Kabulit.
Nëna e Haros Jr., Frances, humbi jetën në sulmet në Qendrën Botërore të Tregtisë.
‘Unë kërkoj që Presidenti Biden të mos e shfaqë surratin në Ground Zero më 11 shtator. Ajo tashmë është tokë e shenjtë dhe nuk mendoj se ai ka vend atje’, tha Haros Jr.
‘Është e turpshme që ai përdor trupat e të vdekurve si propagandë politike për të bërë xhiron e fitimtarit. Ai është i pandjeshëm dhe nuk tregon dhembshuri për ato familje.
Jo Joe, nuk ka fitore, tani jemi në Luftën e Afganistanit 2.0. Ato viktima e mbajtën Amerikën të sigurt për gjithë ato vite. Biden nuk duhet ta çnderojë dinjitetin dhe patriotizmin e tyre.
Ai vetë nuk ka. Interesante, sepse të shtunën Gjyqtarja Jeanine e quajti presidentin ‘kryegënjeshtar’. Sot unë e quaj kryevrasës.
Nuk bëhet fjalë vetëm për 13 të vrarët apo për mijëra amerikanë dhe përkrahës të lënë për të vdekur. Unë besoj se ai është fajtor për gjenocidin që do të ndodhë kundër amerikanëve dhe afganëve’.
