Policia e Kukësit ka arrestuar një 40 vjeç banues në Kukës, pasi ka tentuar të vrasë drejtorin e Aluizni-i Vladimir Spahiu 46-vjeç.
I arrestuari ka tentuar të vrasë drejtorin për shkak të detyrës, por ngjarja është parandaluar nga Policia. Ende nuk janë bërë të ditura arsyet e këtij krimi në tentativë.
Njoftimi i Policisë:
Ndërhyrja në kohë e Policisë, parandalon një ngjarje të rëndë kriminale.
Arrestohet në flagrancë autori, si dhe i bllokohet arma e gjahut.
Eshtë marrë informacion se një shtetas ka kërcenuar shtetasin V.S, për shkak të detyrës, menjëherë strukturat e Policisë të Komisariatit dhe DVP Kukës kanë vlerësuar informacionin dhe organizuar punën, ku u bë e mundur arrestimi në flagrancë i shtetasit;
-P.H., vjeç 40, banues në Kukës.
Nga veprimet hetimore rezulton se shtetasi P.H., ka kërcënuar shtetasin V.S., vjeç 46, banues në Kukës, për shkak të detyrës, dhe është larguar në banesë për të marrë armën e gjahut të cilën e posedonte me leje, ku është rikthyer përsëri, duke prishur dhe qetësinë publike, dhe në këto momente falë ndërhyrjes së shpejtë të Policisë u bë e mundur kapja e autorit si dhe bllokimi i armës.
Materialet për veprime të mëtejshme i kaluan Prokurorisë së Rrethit Gjyqësor Kukës për veprat penale “Kanosja për shkak të detyrës” dhe “Prishja e qetësisë publike”.
