Ekstradohet nga Spanja drejt vendit tonë, 31-vjeçari Dritan Dedja me masë sigurie “Arrest në burg”, për veprën penale “Korrupsioni aktiv i gjyqtarit, prokurorit dhe i funksionarëve të tjerë të drejtësisë ”, kryer në bashkëpunim.
Kujtojmë se më herët u arrestua prokurori Edmond Karriqi i cili liroi Ramadan Dedjan për 2 mijë euro.
“Dritan Dedja, 31 vjeç, banues në Tiranë, Gjykata e Posaçme e Shkallës së Parë Tiranë i ka caktuar masën e sigurisë “Arrest në burg”, për veprën penale “Korrupsioni aktiv i gjyqtarit, prokurorit dhe i funksionarëve të tjerë të drejtësisë ”, kryer në bashkëpunim.
Në vitin 2019, shtetasi R.Dedja. (vëllai i shtetasit Dritan Dedja) është arrestuar për veprën penale “Prodhimi dhe shitja e narkotikëve. Pas arrestimit, 31-vjeçari Dritan Dedja dyshohet se i ka ofruar një shumë parash prokurorit Edmond Karriqi, për ndryshimin e masës së sigurisë për vëllain e tij.”
Ish-prokurori Edmond Karriqi, u dënua me dy vite burg, pasi ishte arrestuar si pjesë e korrupsionit në sistemin e drejtësisë. Ai është liruar me kusht nga GJKKO, që dënimin e mbetur ta kalojë në shërbim prove.
