Vetëm pak ditë pasi mazhoranca rrëzoi me 74 vota kundër projektligjin e dorëzuar nga opozita “Për Statusin e Minatorit”, minatorët dolën në protestë para Kryeministrisë.
Sindikatat e minatorëve, të zhgënjyer nga vendimmarrja e Kuvendit, kujtojnë premtimin që kanë marrë prej vitesh nga qeveria dhe statusin që ende nuk është bërë realitet.
“Kemi 35 vjet që protestojmë, por ne trokasim në derën e shurdhit sepse politika jonë 35-vjeçare është një politikë e shurdhër. Ne kërkojmë statusin pa frikë e turp”, tha ish-minatori Qani Shino.
Minatorët kanë dorëzuar edhe një shkresë zyrtare në Kryeministri dhe paralajmërojnë se nuk do të ndalen në kërkesat për të drejtat e tyre.
“Ne do ta mbrojmë me jetët tona! Statusi do të merret se s’bën!”, tha ish-minatori Kadri Disha.
Vjeshta e vitit të kaluar ishte një periudhë protestash të shumta të minatorëve, sidomos të atyre në minierën e Spaçit, por edhe në qytete të tjera.
Në tetor 2024, një draft ligjor për Statusin e Minatorit, u depozitua në Kuvend nga Partia Demokratike. Projektligji parashikonte që paga e minatorëve të ishte jo më pak se dyfishi i pagës minimale, ndërsa e drejta për pension të parakohshëm të niste pas 25 viteve punë në minierë. Gjithashtu, për rastet e humbjes së jetës në aksident, familjarët do të përfitonin 50% të pagës mujore, si dhe bursa shkollimi për fëmijët.
Projektligji parashikonte gjithashtu trajtim mjekësor falas, dëmshpërblim për aksidentet në punë dhe mbulim të kostove për rikuperimin e dëmeve fizike.
Por mazhoranca i tha jo draftit me argumentimin se nuk sillte përfitime të mëdha për minatorët nga trajtimi aktual që ata kanë me ligj, ndërsa barra për buxhetin e shtetit do të ishte shumë e madhe.
gijotina.com/
