Komisioni i Prokurimit Publik nuk do të shqyrtojë ankesën për tenderin e monitorimitë treguesve mjedisorë në tre hidrocentralet e Kaskadës së Drinit, pasi është depozituar 1 ditë jashtë afatit të parashikuar me ligj.
Në vendim KPP rithekson bindjen, se për shkak të specifikës së prokurimeve publike, respektimi i afateve, është i një rëndësie thelbësore e me ndikim të drejtpërdrejtë në efikasitetin e procedurës, duke lejuar Korporatën Elektroenergjetike Shqiptare të vijojë me hapat e mëtejshëm.
Ky tender nuk ka arritur të finalizohet prej 1 viti, për shkak të ankesave të operatorëve ekonomikë dhe pranimit të tyre nga Komisioni i KPP. Vitin e kaluar KPP vendosi anulimin e procedurës, teksa në datën 8 gusht KESH rishpalli garën për kompanitë e interesuara.
Në ankesën e fundit kompania kërkonte ndryshimin e kritereve të kualifikimit, e ku një prej tyre ishte moslejimi i marrjes me qira të laboratorëve. Kompania e konsideronte të padrejtë kërkesën për të patur me qira lobaratorin fiziko-kimik që do të kryejë analizat, pasi nuk mundet që një operator ekonomik, i cili merret me një veprimtari të ndryshme dhe që nuk e ka objekt veprimtarie monitorimin mjedisor të marrë me qera laboratorë e të konkurrojë në tenderë”.
“Operatorët ekonomikë, që janë të specializuar për këtë shërbim janë laboratorë mjedisorë, të cilët kanë këtë objekt veprimtarie dhe kanë punonjës të specializuar, pajisje testuese laboratorike me anë të të cilave merren dhe analizohen të dhënat nga kampionë të ndryshëm”, – shtohej më tej. Monitorimi i treguesve mjedisorë vjen në zbatim të detyrimeve që lindin nga marrëveshja e kredisë me Bankën Europiane për Rindërtim dhe Zhvillim për projektin “Ristrukturimi i KESH sh.a”/ Marrë nga Scan/
