Abuzimi me tenderë tashmë është kthyer në “tabu” që po merr përmasa qesharake. Në një kohë kur vendi është duke u përballur me krizë ekonomike e qytetarët janë vënë me “shpatulla pas murit” për të përballuar rritjen e çmimeve në pothuajse të gjitha sektorët, institucionet në varësi të bashkive mendojnë si të “përfitojnë” sa më shumë lekë nga tenderët pa garë.
Ndërsa pensionistët për shkak të rritjes së çmimeve detyrohen të heqin nga lista ushqimore fruta e perime, këto të fundit nuk kursehen “falas” për kafshët e kopshtit zoologjik. Agjencia e Parqeve dhe Rekreacionit në varësi të bashkisë ka dhënë tender pa konkurrencë, për të ushqyer kafshët e izoluara.
Ky paralelizëm sa qesharak aq edhe “për të ardhur keq”, vërtetohet në dokumentin e siguruar nga 27.al ku rreth 70 milion lekë të vjetra do të zbrazen nga buxheti i shtetit për bukë e fruta-perime në kopshtin zoologjik Tiranë.
Po në dokumentin e publikuar evidentohet se agjencia ka paraqitur ofertë vetëm një kompani fituese “NELSA” sh.p.k. Ndërsa shtrohet këtu pyetja, pse duhet të shpenzohen 7 milion lekë të reja për ushqyerjen e kafshëve të egra, më tepër në situatën që ndodhet vendi ynë. Ndërsa çdo ditë qytetarët vazhdojnë të ankohen për jetesën e shtrenjtë e pagat minimale në vendin tonë. Sakaq ky fond mund të përdorej për të pastrehët, por siç duket radha e tenderëve dhe gangrena e abuzimeve me arkën e shtetit vazhdon në mënyrë absurde.
