Temperaturat ekstreme të ditëve të fundit kanë sjellë edhe ngrirjen e disa lumenjve në vendin tonë. Lumi Fan i Madh ka ngrirë totalisht dhe në zona të caktuara ngrica ka krijuar pista akulli.
Temperaturat nën zero që kanë shoqëruar vendin gjatë këtyre ditëve kanë ngrirë edhe sipërfaqe të mëdha të lumit Kir, në Bashkinë Shkodër dhe lumit Drin në Lezhë. Për banorët e zonës kjo është një ngjarje e rrallë, pasi prej vitit 1985 nuk mbahet mend një fenomen i tillë.
Edhe në Berat, në një pjesë të lumit Osum, ka nisur formimi i shtresave të akullit, gjithashtu një fenomen i pazakontë për banorët të zonës.
