Të verbërit bashkë me disa persona me aftësi të kufizuara kanë protestuar për dy orë para Parlamentit, për t’i bërë thirrje qeverisë që të përmbush premtimet e pambajtura.
Kreu i Shoqatës së të Verbërve, Sinan Tafaj, tha se qeveria duhet të rrisën në masën 10% pagesën e paaftësisë si dhe t’i kthejë borxhin kësaj shtrese.
“Fatkeqësia na ka mar dritën, por zërin na e ka mar qeveria me ligj. Ne nuk kemi përfaqësues në Këshillin ndërdikasterial të qeverisë, sepse qeveria me ligj ka mar të drejtën të caktojë vetë përfaqësuesit. Atë që mori përfaqësues i dha post shtetëror”, deklaroi Tafaj.
Protesta e të verbërve është mbështetur edhe nga analisti Fatos Lubonja.
“Kemi 25 vjet që fiton e keqja në këtë vend. Nuk mund t’ju jap ndonjë shpresë të madhe këtu në një kohë kur vendi është në dëshpërim të madh. Protesta juaj, protesta e njerëzve më të brishtë të kësaj shoqërie është denoncimi më i madh për politikën”, pohoi Lubonja.
