Rikonstruksioni i rrugëve në zonën e Fushë-Krujës prej vitesh ka mbetur thjesht premtim elektoral. Kështu shprehen banorët e Urës së Gjolës, të cilët u ngritën në protestë në lidhje me aksin që lidh fshatin e tyre me autostradën Fushë Krujë-Vorë.
Megjithëse në të gjithë gjatësinë e saj rruga është plot gropa e pellgje me ujë, në të nuk janë kryer asnjëherë investime serioze.
“Më shumë e kemi riparuar vetë. Në bashki jemi të humbur, të tradhtuar sepse nuk i ka rënë ndërmend për asnjë nga ne”, thotë një prej banorëve.
Madje kjo rrugë nuk ka parë kurrë asfalt dhe pse buzë saj jetojnë rreth 100 familje. Për rrjedhojë banorët thonë se aksi është bërë i pakalueshëm.
“Kjo gjendje vazhdon me vite. Vijnë, i japin një lustër dhe kështu është bërë rruga gjithmonë. Jemi ankuar në bashki, s’pyet kush për ne a jemi gjallë, a jemi vdekur”, shton një banor tjetër.
Kalimi i autoambulancave apo zjarrfikëseve në këtë rrugë është i pamundur thonë banorët dhe nëse dikush niset i sëmurë për në spital, me shumë gjasa atje mbërrin i vdekur për shkak të gjendjes së rrugës.
“Ne kërkojmë ta rregullojnë rrugën, të jesh i sëmurë do dy orë të dalësh në Urën e Gjolës. S’kemi ku të shkojmë, është bërë gropa-gropa. Për tokën time 170 mijë lekë më kanë dhënë, të vjetra, me dokumente”, shprehet njëri prej banorëve.
Ata shtojnë se nëse nuk marrin një përgjigje konkrete nga Bashkia e Krujës për ndërtimin e rrugës, do të bllokojnë autostradën Fushë Krujë-Vorë.
Ata thonë se ishin ndër më të prekurit nga shpronësimet për ndërtimin e autostradës Thumanë-Kashar, kohë në të cilën iu është premtuar edhe ndërtimi i rrugës së Urës së Gjolës, premtim që mbeti pas me kohën.
