Është zbardhur rekursi i plotë që SPAK ka bërë në Gjykatën e Lartë për dënimin me 3 vite e 4 muaj burg të ish-ministrit të Brendshëm Saimir Tahiri, duke kërkuar që ish ministrit të dënohet më rëndë.
SPAK ka ankimuar në Gjykatën e Lartë vendimin për dënimin e Tahirit vetëm për shpërdorim detyre, duke kërkuar që ish ministri të dënohet dhe për trafik droge në kuadër të grupit të strukturuar kriminal.
SPAK i kërkon Gjykatës së Lartë kthim për rigjykim në Apel të çështjes me një trupë të re gjyqtarësh. Kjo masë përfshin edhe ish-drejtorin e Policisë së Vlorës, Jaeld Çelën. Pritet që brenda javës të pandehurit të bëjnë rekurs në Gjykatën e Lartë.
Kujtojmë se Tahiri u dënua me 3 vite e 4 muaj burg vetëm për shpërdorim detyre, ndërsa aktualisht po vuan dënimin në burgun e Fierit.
Pas një seance maratonë, GJKKO e dënoi me Tahirin me 5 vite burg për “Shpërdorim të detyrës”, por në kuadër të gjykimit të shkurtuar dënimi iu ul 3 vite e 4 muaj burgim. Tahiri u dënua vetëm për “Shpërdorim detyre” duke i shpëtuar akuzave për “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”.
Në argumentimet e vendimit, Apeli i GJKKO nënvizon se rezulton se Tahiri ka lidhje me Moisi Habilaj dhe Artan Habilaj dhe këto lidhje kanë ndikuar që grupi kriminal të infiltrohet në radhët e punonjësve të policisë dhe të shtetit dhe të pengojë luftën ndaj trafikut të drogës.
Sipas Gjykatës, Tahiri provohet se ka përfituar nga Moisi Habilaj dhe Artan Habilaj për përfitime të padrejta dhe njëkohësisht shpërdorimi i detyrës duke dëmtuar interesat e shtetit, arsye për të cilat kërkojnë që të dënohet më rëndë.
