Vangjel Tavo nuk ka durim të zbatojë ligjin e prokurimeve, prandaj 3 tendera brenda disa ditëve i ka kaluar me një pjesëmarrës. Me fjalë të tjera, në tendera morën pjesë vetëm përfituesit e parave të bashkisë. Dhe janë mbi 800 milionë lekë të taksapaguesve, që dalin nga arka në shkelje të ligjit.
Rruga e Gjilekës, që u shërben resorteve të oligarkëve
Pasi i shpalli investitorë strategjikë dhe u dha leje për ndërtim resortesh turistike, qeveria ua çon rrugën tek çadrat oligarkëve. Në lagjen Gjilekë të Dhërmiut janë dhënë disa resorte Gjikurisë me shokë, por këta nuk rregullojnë asnjë gur në këtë zonë, por vetëm përfitojnë nga buxheti.
Objekti i tenderit të parë që po raportojmë është “Rikonstruksioni i rrugës kryesore Gjilek (vazhdim)”. Burimi i financimit është buxheti i Bashkisë Himarë, miratuar me Vendimin e Këshillit Bashkiak nr.57, date 21.12.2023, në të cilin ka hedhur firmën edhe Vangjel Tavo, në atë kohë Prefekt i Vlorës.
Fondi limit për këtë copë rrugë 4 metra të gjerë është 45 000 000,00 lekë. Dhe bëhet fjalë për një rrugë ekzituese, që në disa vende do të zgjerohet.
Tenderi është zhvilluar me vetëm një pjesëmarrës, firmën “RSM Company” me pronar Agim Kolën, vëllain e ish-deputetit të PS, Ndue Kola. Ky ka marrë për t’i treguar shtigjet e bashkisë Himarë firmën vendase “Implex” që zotërohet nga Sofokli Goga.
Data e njoftimit të tenderit ishte më 18 dhjetor 2024, ndërsa dokumentet duheshin dorëzuar deri më 3 janar 2025. Duke qenë se bashkia Himarë ka namin e keq të kryetarëve të korruptuar që kanë punë me SPAK-un, kompanitë e ndërtimit nuk marrin pjesën në tenderat e saj. Në këto procedura paraqiten vetëm fituesit e paracaktuar.
Oferta e bashkimit të operatorëve që është shpallur fitues është 39 057 375,00 lekë pa TVSHm ndërsa shpallja është bërë në Agjencinë e Prokurimit Publik më 4 shkurt 2025.
Tenderi është vlerësuar nga Open Data Albania me “Flamur të Kuq”, që është shenja e riskut të korrupsionit.
Kush është përfituesi i tenderit?
Përfituesi i këtij fondi, Agim Kola paraqitet me emra të ndryshëm kompanish, sipas rastit. Kur është fjala për koncesione si “Milot-Balldre”, përdor firmën ANK, për para të vogla nga bashkitë fut firmën “Rrugë Sinjalistike Mirembajtje & Hidro Company”, ose firmën “COMPANY RIVIERA 2008”. Për furnizime të institucioneve me materiale ndërtimi ka kompaninë RIVIERA PARAFABRIKAT.
Ndërsa firmën me të cilën ka fituar këtë tender “RSM Company” e ka regjistruar në Kosovë. Agim Kola ka fituar shpesh tendera me “Flamur të kuq”, i favorizuar nga zyrtarët e korruptuar dhe lidhjet e vëllait me Erion Veliajn, Evis Berberin dhe politikanë të tjerë në pushtet.
Më 12 shtator 2019, Policia e Shtetit ndaloi biznesmenin Agim Kola, i cili akuzohej se nëpërmjet blerjeve dhe shitjeve me fatura fiktive kishte përfituar në mënyrë të paligjshme një sasi të konsiderueshme parash.
Në prangat e policisë ra administratori i kompanisë Rr.s.M dhe Hidro Company, Agim Kola, i cili akuzohej se është i përfshirë në skemën e evazionit 30 milionë euro me faturat fiktive.
Nga operacioni i luftës ndaj informalitetit janë dërguar në atë kohë para gjykatës 16 biznesmenë për fshehje të të ardhurave. Gjykata e Tiranë masën e dënimit për 15 prej tyre: 9 biznesmenë janë lënë në arrest shtëpie, kurse 6 të tjerë janë dënuar me 20 ditë burg.
Më 17 shkurt 2024, Prokuroria e Posaçme kundër Korrupsionit dhe Krimit të Organizuar, nisi hetimin dhe regjistroi procedim penal ndaj drejtorit të Autoritetit Rrugor, Evis Berberi dhe vëllezërve Kola, pronarë të firmës kontraktore “A.N.K Sh.p.k”.
Akuza e ngritur është shpërdorim detyre, mashtrim me projektin e rrugës, mashtrim teknik, mashtrim e falsifikim me procesin e mbikëqyrjes së punimeve, kryer në bashkëpunim mes drejtorit Ervis Berberi dhe ndërtuesve Ndue e Agim Kola.
Rrugët e Qeparoit duhen para zgjedhjeve
Edhe për rrugicat e fshatit Qeparo, Kryetari Tavo ka përdorur të njëjtën metodë, me një pjesëmarrës në tender. Bëhet fjalë për tenderin me objekt “Rrugë aksesi Qeparo Fushë nr.1 dhe nr.2.” me fond limit 15 000 000,00 lekë.
Paratë i janë dhënë me tender formal kompanisë JODY COMPANY SHPK natën e Vitit të Ri. Siç shohim tenderi është zhvilluar më 30 dhjetor 2024 dhe një ditë më vonë është shpallur fituese kompania e Simon Çipës.
Për shkeljet e bëra, tenderit është shënuar nga Open Data Albania me “Flamur të kuq”, që është shenja e riskut të korrupsionit. Rrugicat që do të asfaltohen janë në gjendje të mirë, por bashkia me siguri kërkon të tërheqë vëmendjen e banorëve para zgjedhjeve.
Vranishti me qendër të re
Tenderi i tretë i urdhëruar nga Vangjel Tavo lidhet me një projekt të vjetër të fshatit Vranisht. Konkretisht Bashkia Himarë ka prokuruar fondin prej 20 833 333,00 lekë, me objekt “Rikualifikimi qendrës së fshatit Vranisht”. Edhe ky tender është mbyllur me shpejtësi ditët e fundvitit dhe fituesi është pjesëmarrësi i vetëm në tender. Në këtë procedurë ka përfituar fondin bashkimi i operatorëve “T&J Construction” sh.p.k. – “VIANTE Konstruksion” sh.p.k.
Pronarët respektivë Julian Manahasa dhe Gjergji Bezati janë të mbingarkuar me tendera në të njëtën kohë, falë favorizimeve të tilla nga zyrtarët vendorë. Kështu, kompania “T&J Cnstruction” aktualisht është e angazhuar në kontratën me bashkinë Lushnjë “Blerje materiale ndërtimi për mirëmbajtjen e ambienteve të institucioneve arsimore – Marreveshje Kuader me një operator ekonomik me afat 12 muaj”, e firmosur më 25 nëntor 2024. “Viante konstruksion” është angazhuar ndërkohë në kontratën “Rikonstruksion i rrugëve “Sheshi dhe Liqeni” fshati Picar, Bashkia Vore”, që e ka firmosur më 7 nëntor 2024 dhe zgjat 7 muaj.
Tenderi i firmosur më 27 janar 2025 mban “Flamur të kuq” për shkeljet e bëra, ndërsa bashkia Himarë ua ka besuar paratë dy kompanive që i kanë duart e zëna dhe me shumë gjasa do ta zvarrisin projektin.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
