Arkeologu Fatos Tartari tha se ndihet i shqetësuar nga fakti që gjatë gërmimeve për Velierën në Durrës po dëmtohen objekte të rëndësishme arkeologjike.
Zbulimi i tri varreve ilire sipas Tartarit thellon argumentin se e gjithë zona para Torrës Veneciane duhej të ishte ruajtur e paprekur, sepse ka qenë projektuar si Muzeu i Durrësit, ku ndërthuren të gjitha qytetërimet.
“Do ishte tamam një muze që do t’i paraqiste studiuesit të gjithë dokumentacionin Venecian. Do të ishte një muze nga më të rrallët në Adriatik dhe Jon, për arsye se ky dokumentacion i depozituar në arkivat e Venedikut, të Vatikanit për Durrësin nga një rëndësi të veçantë nga shekulli i XIII në shekullin e XV“, tha Tartari.
Pas deklaratës së arkeologu Eduart Shehi se varret, “datojnë nga shekulli i VII deri në shekullin e XIII, nuk kanë ndonjë objekt dhe vlerë të veçantë, ngaqë u përkasin njerëzve të thjeshtë”, arkeologu Tartari është krejt në kundërshtim me deklaratën e Shehit.
“Kur thoni vlerën, ju thoni vlerë monetare, vlerat janë pikërisht këto: dëshmi autentike historike që po t’i rrënonin që po t’i zhdukësh do të thotë që Durrësit ta shndërrosh në një qendër të thjeshtë tregtare, të parëndësishme, pa këto kulme të rëndësishme që ai ka shfaqur të ndryshme të historisë së tij“, tha arkeologu Tartari.
