Talibanët në Afganistan kanë emëruar liderin e ri, i cili zëvendëson Mullah Akhtar Mansur që u vra në një sulm me dron nga SHBA-ja, javën e kaluar.
Në një deklaratë të lëshuar sot, grupi konfirmoi vdekjen e Mansurit dhe emëroi Mullah Haibatullah Akhundzada, njëri nga dy zëvendesit e Mansuit dhe ish- kreun e gjyqësorit Taliban, si pasardhësin e tij.
Në deklaratë thuhet se Akhundzada u emërua “pas vendimit unanim” në një takim të liderëve talibanë, që besohet të jetë zhvilluar në Pakistan.
Zëdhënësi i Talibanëve, Zabihullah Mujahid, tha se janë përzgjedhur edhe dy zëvendës, Sirajuddin Haqqani, kreu i një rrjeti që u akuzua për sulme me bomba ndaj shumë objektivave të profilit të lartë në Kabul gjatë viteve të kaluara dhe Mullah Mohammad Yaqoob, i biri i ish- liderit Mullah Mohammad Omar.
Mansuri u vra në Pakistan më 21 maj, kur makina e tij u godit nga një dron i SHBA-së në krahinën jugperëndimore të Balochistan.
Mansuri u shpall lider i Talibanëve në Korrik të vitit 2015, pak ditë pasi qeveria afgane konfirmoi se lideri shpirtëror i Talibanit, Mullah Mohammad Omar, vdiq në qytetin Karaçi të Pakistanit, dy vjet më parë.
