Presidenti i Afganistanit Ashraf Ghani është larguar nga vendi, thonë raportet, duke cituar zyrtarë afganë.
Largimi i tij vjen, ndërkohë që talebanët arritën në periferi të Kabulit. Zëvendëspresidenti Amrullah Saleh gjithashtu raportohet se ka ikur.
Ghani është vënë nën presion për të dhënë dorëheqjen pasi qytetet kryesore rreth Afganistanit kanë rënë nën kontrollin e militantëve talebanë gjatë 10 ditëve.
Mediat e huaja raportojnë se Ghani është larguar në drejtim të Taxhikistanit.
E pyetur për koment, zyra e presidentit i tha agjencisë së lajmeve Reuters se “nuk mund të thotë asgjë për lëvizjen e Ashraf Ghani për arsye sigurie”.
Talebanët dhe zyrtarët e qeverisë afgane janë në negociata për një transferim paqësor të pushtetit pasi luftëtarët rrethuan kryeqytetin Kabul.
Trupat talebane rrethuan selinë e qeverisë së Afganistanit të dielën, por premtuan se nuk do të sulmonin pasi bisedimet për dorëzimin ishin në proces.
