Rritja e çmimeve e taksave të bizneseve që po rëndon direkt në xhepat e qytetarëve shqiptarë, vazhdon të justifikohet nga bashkitë me “luftën në Ukrainë”.
Përllogaritjet e Bashkisë Tiranë dukshëm favorizojnë kryetarin, pasi të dhënat zyrtare tregojnë se nga 100% të importit të hidrokarbureve tek ne, vetëm 12% vjen nga Rusia, pjesa tjetër 88%, vjen nga vende të tjera që nuk e marrin nga Rusia.
Në këto kushte, zgjidhja që kryetari i Bashkisë Tiranë jep është shtyrja e afatit për taksat, në vend që këto taksa të ulen.
Këshilli Bashkiak i Tiranës miratoi sot vendimin për shtyrjen e afatit të pagesës për tarifën e pastrimit, taksën e tabelës dhe taksën e përkohshme të infrastrukturës arsimore për në datën 20 maj 2022.
Gjithashtu dhe shtyrjen e afatit të pagesës së këstit të parë për taksat mbi pasurinë e paluajtshme, përkatësisht, taksa mbi ndërtesën, taksa mbi truallin dhe taksa mbi tokën bujqësore për në datën 20 maj 2022.
Këshilli miratoi dhe shtyrjen e afatit të pagesës së këstit të dytë për taksat mbi pasurinë e paluajtshme, përkatësisht, taksa mbi ndërtesën, taksa mbi truallin dhe taksa mbi tokën bujqësore për në datën 31 korrik 2022. Lajmin e dha kreu i Bashkisë së Tiranës, Erion Veliaj.
“Më duket diçka e arsyeshme, edhe për faktin se me kostot e rritura të disa shpenzimeve, siç mund të jetë nafta apo shpenzime të tjera, i jep biznesit një muaj frymëmarrje, për të mos i vënë nën presion për të kapur afatet. Besoj se është lajm i mirëpritur nga të gjithë”, deklaroi Veliaj.
Në fund ajo që ngelet po e njejtë, janë taksat e papërballueshme.
