Ish-deputeti i Partisë Demokratike, Endri Hasa është shprehur se taksa prej 2.5 eurosh që do të vendoset për këdo që kalon me makinë në autostradën Tiranë-Durrës, është një tjetër grabitje e qeverisë së Ramës.
Përmes një deklaratë për shtyp, ish deputeti tha se fituesi i koncesionit është paracaktuar muaj më parë nga qeveria e Edi Ramës, njësoj si në autostradën Durrës- Kukës.
Ndër të tjera, Hasa shtoi se Rama në bashkëpunim me ministren Balluku po vjedhin shqiptarët, ndërsa shtoi se jo taksë do të hiqet kur PD-ja të vijë në pushtet.
“Pak ditë më parë, PD paralajmëroi shqiptarët se qeveria shqiptare ka nisur të zbatojë projektin “të kapim ç’të kalim”. Ndër ta është edhe koncesioni për autostradën Tiranë – Durrës, duke detyruar shqiptarët të paguajnë 2.5 euro. Në krye ka vendosur ministren Balluku. Fituesi i koncesionit është paracaktuar muaj më parë nga qeveria e Edi Ramës, njësoj si në autostradën Durrës- Kukës.
Për autostradën Tiranë – Durrës qeveria ka shpenzuar 4 milionë euro për shpenzime me palma. Këto para do të hidhen në kosh se Edi Rama dhe Belinda Balluku kanë vendosur të vjedhin shqiptarët. PD paralajmëron kompanitë që të mos marrin pjesë në koncesione të tilla. Partia Demokratike iu thotë shqiptarëve se kur PD të vijë në pushtet nuk do lejojë të tilla koncesione, por në autostradë do të kalohet falas. Kjo është arsye tjetër pse Rama duhet që të largohet”, deklaroi ish-deputeti Hasa.
