Kryetari i Kuvendit Ilir Meta gjatë takimit që pati me Zv. Ndihmës Sekretarin e Shtetit të SHBA Hoyt Brian Yee, është shprehur se “Bojkoti nuk është zgjidhje”.
Meta i ka shprehur zyrtarit të DASH që edhe mazhoranca duhet të tregojë vullentin e saj për ti plotësuar kërkesat opozitës.
“Bojkoti nuk është zgjidhje dhe opozita duhet të gjejë të gjitha forcat për t’u përfshirë në procesin zgjedhor, për t’i shërbyer demokracisë dhe të ardhmes evropiane të vendit. Njëkohësisht mazhoranca duhet të tregojë vullnet maksimal për përfshirjen e opozitës dhe respektimin e kërkesave dhe të drejtave të saj.” , tha Meta.
Zv. Ndihmës Sekretari i Shtetit të SHBA Hoyt Brian Yee e uroi Meta për zgjedhjen e tij në postin e Presidentit të Republikës dhe vuri në dukje se SHBA do të vazhdojë të mbështesë përpjekjet për të forcuar demokracinë dhe për të luftuar korrupsionin dhe krimin e organizuar në Shqipëri.
