Kryeministri Edi Rama ka dhënë një deklaratë për mediat nga Praga, ku ka folur para Takimit të Komunitetit Politik Europian që përfshin në bisedime 40 liderë nga e gjithë bota.
Kreu i qeverisë ka thënë për mediat e pranishme atje se është e nevojshme që shtetet europiane të jenë së bashku duke thënë se kjo ide rilindi në një kohë krize dhe uroi që të mos jetë nevoja për një tjetër takim.
“Nuk është një ide e re, është ide e vjetër. Takimi do të vazhdojë dhe shpresoj të ndërtojmë diçka për njerëzit tanë. Kjo ide rilindi pasi pati një krizë, shpresoj të mos ketë një krizë tjetër për të pasur një tjetër takim. Sigurisht nuk është një ide e re, është një ide shumë e vjetër, por rilindi në kohë krizash dhe shpresoj që mos ketë nevojë për një krizë tjetër për të mbajtur një takim të tillë. Por nga ky takim do të bëjmë përpara dhe do të vijomë të ndërtojmë diçka shumë të rëndësishme për komunitetin e madh të shteteve europiane dhe njerëzve”, tha Rama për gazetarët.
Qëllimi i forumit të ri është përmirësimi i bashkëpunimit midis vendeve evropiane përtej kufijve të Bashkimit Evropian, si Britania e Madhe, Turqia, vendet e Ballkanit Perëndimor dhe rajonit të Kaukazit.
Kryeministri ukrainas Denys Shmyhal do të marrë pjesë personalisht ndërsa presidenti Volodymyr Zelensky do të bashkohet me video. Veç problemeve ekonomike, udhëheqësit do të mbajnë bisedime mbi ndryshimin e klimës, krizën energjetike dhe pushtimin rus të Ukrainës. Diskutimet do të pasohen nga takime dypalëshe.
