Kryetarja e Komisionit të Integrimit Europian Jorida Tabaku zhvilloi sot një takim me përfaqësues të Komisionit homolog të Kosovës. Ajo theksoi se ky është takimi i parë i përbashkët i dy Komisioneve të Integrimit të dy vendeve dhe se do të jetë pikënisja e një bashkëpunimi të frytshëm dhe të gjatë.
Tabaku tha se nuk ka dhe nuk do të ketë anëtarësim të plotë të Ballkani pa Kosovën, duke theksuar se Shqipëria do të jetë mbështetëse kryesore për të.
“Aplikimi i Kosovës për anëtarësim në Këshillin e Europës është një lajm i mirë që si shqiptarë po e prisnim këtë muaj. Dua të përgëzoj shtetin e Kosovës për standardet e larta që ka vendosur lidhur me luftën ndaj korrupsionit, zhvillimin e zgjedhjeve, treguesve të demokracisë dhe politikbërjen, që duhet të jenë patjetër një leksion për qeverinë Shqiptare, që nga ana tjetër, nuk gëzohemi dot në të njëjtën mënyrë, pasi nuk tregon të njëjtin standard në këta tregues.”, u shpreh ajo.
Tabaku tha se Këshilli i Integrimit në Kuvendin e Shqipërisë duhet t’i japë mbështetje jo vetëm anëtarësimit të Kosovës në KiE, por edhe në procesin për liberalizimin e vizave, pasi ka arritur të gjitha objektivat dhe të mundësohet që qytetarët kosovarë të takojnë familjarët e tyre, që fatkeqësisht shumica jetojnë jashtë Kosovës. Tabaku përfundoi fjalën e saj duke theksuar se Kosova ka kaluar një proces të gjatë pas luftës dhe ka pasur rezultate konkrete, prandaj e meriton të aderojë në çdo strukturë ndërkombëtare.
