Pas akuzave të kryeministrit Rama ditën e djeshme, ka ardhur dhe reagimi i rektorit të Universitetit të Tiranës Mynyr Koni.
Koni thotë se është i detyruar të reagojë nga akuzat tepër të rënda dhe sjellja e Kryeministrit ndaj tij. Ai thotë se nuk i ka ikur përgjegjësisë si rektor i Universitetit të Tiranës, por i ka paraqitur problematikat që ekzistojnë, të cilat po i pranon tani edhe vetë Rama.
Nga ana tjetër ai ka akuzuar kryeministrin, i cili sipas tij në çdo rast bën presione, shantazhe, ironizon dhe intimidon, jo vetëm në mënyrë të drejtpërdrejtë, por edhe medias.
“Në çdo rast, Ju ushtroni presion, intimidoni, ironizoni dhe shantazhoni, jo vetëm në mënyrë të drejtëpërdrejtë, por edhe nëpërmjet mediave që janë pranë qeverisë, duke mos i dhënë mundësinë askujt, në rastin konkret mua, të shprehem dhe të them të vërtetën se çfarë realisht po ndodh në Universitetin e Tiranës”, shkruan Koni.
