Fermerët e Kosmaçit janë mbledhur për të protestuar ditën e sotme për çmimin e naftës dhe subvencionit nga qeveria. Sipas tyre ka abuzime dhe shpërndarja e naftës ka qenë selektive dhe politike. Prej kohësh, fermerët kanë ngritur shqetësimin për rritjen e çmimit të naftës që tashmë ka arritur në shifër të lartë dhe shitet me 258 lekë/litër.
Një prej protestuesve tha se po përfitojnë nga 2-3 mijë litra naftë persona që nuk e kanë tokën të punuar dhe kërkon reagimin e ministres së Bujqësisë Frida Krifca për këto abuzime.
“Ne jemi në mbështetje të fermerëve të Vau Dejws në këtë protestë paqësore. Sa i përket abuzimeve, vjedhjeve që po bëhen në mënyrë drastike për subvencionet për shpërndarjen e naftës, jam sot këtu. I bëj thirrje ministres Krifca sepse ka informacionin e duhur, e bollshëm sa i përket abuzimeve që po ndodhin me fermerët për subvencionet e naftës. Në këto momente që flasim janë shpërndarë mbi 120 mijë litra naftë, ku në listën e përfituesve janë regjistruar 350 fermerë. Ka fermerë që kanë përfituar 3 mijë litra naftë dhe nuk kanë asnjë pëllëmbë të sipërfaqes së tokës të punueshme”, tha një prej protestuesve.
