Mësohen detaje të reja nga mbledhja 5 orëshe në Këshillin e Mandative. Ndryshe nga informacionet e mëparshme se ishin 10 mijë faqe dokumente, mësohet se kreu i SPAK, Klodian Braho, ka deklaruar se në USB-në me prova për Belinda Ballukun janë rreth 16 mijë faqe.
Më tej burimet saktësojnë se Braho, duke folur për aksesin që do të kenë anëtarët e Këshillit në USB, do të duhet të firmosin një deklaratë konfidencialiteti, të përpiluar nga Prokuroria e Posaçme.
Kryetar i Kuvendit, Niko Peleshi, i tregoi kreut të SPAK, se edhe Kuvendi i ka gati deklaratat e konfidencialitetit, megjithatë Braho ka ngulmuar që anëtarët e Këshillit do të duhet të firmosin deklaratën e përpiluar nga SPAK, dhe jo atë të Kuvendit.
Sakaq mësohet se kopja e vetme e USB që SPAK ia ka dërguar Kuvendit është futur përsëri në zarf, dhe do të shumëfishohet në 10 kopje aq sa është numri i Anëtarëve të Këshillit, vetëm kur ata të kenë firmosur deklaratën sipas hartimit të SPAK.
gijotina.com/
