Kryetari i Bashkisë Libohovë, Leonard Hide, edhe pse ka një dosje të hapur në SPAK, nuk heziton të shpërdorojë paratë me postin e që i është besuar. Open Data Albania i ka vendosur “Flamurin e Kuq” në kontratën e fundit të firmosur nga Hide, të mbushur plot me shkelje.
Bëhet fjalë për tenderin me objekt ‘Ndërhyrje në shtëpinë e të moshuarve Libohovë’, me fond limit 30 milionë lekë. Nuk ka dokument shoqërues që të paracaktojë ndërhyrjet konkrete që do të bëhen në këtë institucion, por bëhet fjalë për riparimin e godinës.
Shtëpia e të moshuarve në Libohovë është ndërtuar që në vitin 2016 dhe për 8 vite qenka bërë për rikonstruksion.
Në ndërtesë nuk u bë asnjë ndërhyrje edhe pas periudhës së Covid-19 ku u karantinuan emigrantë që ktheheshin nga Greqia.
Është e habitshme që shtëpia është në këtë situatë, sepse shpesh ka përfituar investime nga projekte të ndryshme që është përfshirë. Më i fundit ishte projekti “Një vatër e ngrohtë përtej sfidave të moshës dhe pamundësisë” nga Fondi Social, një bashkëfinancim me Ministrinë e Shëndetësisë.
Hide e shpalli këtë tender më datë 21 tetor 2024, ndërsa “gara” ka qëndruar e hapur formalisht deri më 6 tetor dhe 20 ditë më pas është shpallur është shpallur fituesi.
Gjatë kësaj periudhe janë dorëzuar dy oferta për tenderin, nga “EUROBETON” sh.p.k dhe “TEA-D” shpk, ku kjo e fundit u skualifikua, menjëherë pasi 3 punonjës i ka të angazhuar në një tjetër projekt.
Duke qenë se mbeti në garë vetëm firma “Eurobeton”, procedurat duheshin pezulluar për mungesë konkurrence.
Por Hides favorizoi kompaninë e paracaktuar për të marrë fondin. Prandaj më datë 10 dhjetor 2024 është bërë publike kontrata që iu dha kompanisë me ofertën më të shtrenjtë dhe pa një garë e rregullt. Isuf Meçi, pronar i “Erobeton” ka marrë kohët e fundit 27 kontrata publike, të gjitha nga institucionet në Gjirokastër dhe shumica me “Flamur të kuq”, që është shenja e riskut të korrupsionit, sipas vlerësimit të Open Data Albania.
Skandalet
Hide nuk i trembet këtyre “flamujve” me sa duket, pasi ka shpëtuar nga skandale edhe më të mëdha .
Kujtojmë se në mars të vitit 2023, Leonard Hide, kryebashkiaku i Libohovës paraqitej në seancat paraprake në Gjykatën e Posaçme, pasi akuzohej nga SPAK për shpërdorim detyre në kohën kur ka qenë shef krimesh në komisariatin e Gjirokastrës.
Hide dyshohet se në kohën qe ka pasur detyrën e shefit të Seksionit të Krimeve në Komisariatin e Gjirokastrës ka lejuar përkundrejt përfitimit kultivimin e bimëve narkotike.
Dyshimet janë gjithashtu se përveç personave të përfshirë në këtë aktivitet janë implikuar edhe disa punonjës të tjerë policie.
Ata kanë pasur detyrimin ligjor për zbulimin e aktivitetit kriminal, por ata kundrejt shpërblimeve si dhe nëpërmjet veprimeve dhe mosveprimeve të tyre e kanë lejuar këtë aktivitet”.
Hide mori mandatin si kryebashkiak i Libohovës, nga zgjedhjet lokale të majit të vitit 2023, ku fitoi me 1401 vota përkundrejt kundërshtarit të tij.
Por pavarësisht këtyre akuzave, KQZ vendosi të lejojë vijimin e mandatit të Leonard Hides, i cili tani po bën namin me tenderat.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
