Agjencia e Mbikëqyrjes Policore (AMP), përmes Drejtorisë së Hetimit dhe Drejtorisë Rajonale Vlorë–Gjirokastër, ka ekzekutuar vendimin e Gjykatës së Posaçme të Shkallës së Parë për Korrupsionin dhe Krimin e Organizuar, e cila ka caktuar masën e sigurimit personal “Arrest në shtëpi” për tre punonjës të Policisë së Shtetit në Orikum.
Nën këtë masë sigurie janë vendosur:
-
D. L., inspektor krimesh pranë Stacionit të Policisë Orikum;
-
A. J., shef i Stacionit të Policisë Orikum;
-
A. F., specialist i Policimit në Zonë pranë të njëjtit stacion.
Tre punonjësit e policisë dyshohen për kryerjen e veprave penale “Korrupsion pasiv i personave që ushtrojnë funksione publike”, kryer në bashkëpunim, si dhe “Shpërdorim i detyrës”, parashikuar nga nenet 259, 248 dhe 25 të Kodit Penal.
Sipas hetimeve, në shtator të vitit të kaluar, efektivët e policisë, në kundërshtim me ligjin dhe duke keqpërdorur atributet e funksionit, kanë kërkuar dhe marrë nga një shtetas shumën prej 270 mijë lekësh, në këmbim të shmangies nga përgjegjësia penale.
Hetimi disa mujor, i zhvilluar me metoda speciale nën drejtimin e SPAK, ka bërë të mundur dokumentimin me prova ligjore të përfshirjes së punonjësve të policisë në veprime korruptive dhe shpërdorim detyre.
AMP bën me dije se hetimet vijojnë për zbardhjen e plotë të rrethanave dhe identifikimin e çdo përgjegjësie tjetër të mundshme penale.
Në përfundim, Agjencia e Mbikëqyrjes Policore thekson se mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë çdo rast abuzimi apo shkeljeje nga punonjësit e strukturave shtetërore, përmes numrit të gjelbër 0800 9090, email-it [email protected], WhatsApp 069 41 51 511, ose aplikacionit “Agjencia Digjitale” në Play Store dhe App Store.
