Partia Demokratike, pritet të mbaje pasditen e kësaj të shtune (ora 17:00) protestën e radhës, para Kryeministrisë.
Si pasojë, që prej mbrëmjes së kaluar, në hyrjet kryesore të institucionit qeveritar janë vendosur barriera metalike dhe elementë të tjerë sigurie.
Ndërkohë policia ka njoftuar edhe rrugët që do të bllokohen gjatë zhvillimit të protestës.
Konkretisht:
Nga ora 23:45 e ditës së djeshme, është bllokuar lëvizja dhe parkimi i automjeteve në bulevardin “Dëshmorët e Kombit”, nga “Ura e Dajtit” deri te rruga “Ismail Qemali”, deri në përfundim të protestës.
Nga ora 15:00 e ditës së sotme, do të ndalohet qarkullimi i automjeteve në bulevardin “Dëshmorët e Kombit”, nga kryqëzimi pranë Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.
Autoritetet bëjnë me dije se, në varësi të zhvillimit të protestës, mund të ketë kufizime të tjera të qarkullimit edhe në akse të tjera rrugore.
