Sot në mbrëmje, gjithë vëmendja është në Arenën Kombëtare aty ku Shqipëria do të përballet me Republikën Ceke. Edhe në këtë takim, trajneri Silvinjo nuk pritet të bëjë eksperimente duke i qëndruar besnik skemës së tij të preferuar 4-2-3-1. Porta është e sigurt me gardianin Thomas Strakosha.
Mbrojtja nga krahët do të ketë Mario Mitaj në të majtë dhe Ivan Balliu në të djathtë, ndërsa qëndra me Ismajlin dhe Ajetin. Në mesfushë Asllani, Ramadani dhe para tyre Qazim Laci. Ndërkohë pak më të avancuar janë Asanin dhe Bajrami që do të ndihmojnë majën e sulmit Indrit Tuci.
Me një stadium me kapacitet të plotë, qëllimi është një dhe i vetëm të marrin 6 pikë të plota në dy ndeshjet e fundit në grup për të arritur objektivin e vendit të parë.
Takimi do të luhet të shtunën në mbrëmje duke nisur prej orës 20:45.
Presidenti Duka apel tifozëve: Le të tregojmë qytetari, maturi dhe mikpritje
Kreu i FSHF-së, Armand Duka u bën apel tifozëve të tregojnë maturi dhe mikpritje në shkallët e stadiumit “Air Albania” mbrëmjen e kësaj të Shtune.
“Sonte vazhdojmë rrugëtimin tonë në UEFA Nations League, ndaj Çekisë me të cilën jemi përballur shpesh në dy vitet e fundit dhe kemi përjetuar emocione të shumta. Të gjithë presim një ndeshje të fortë dhe angazhimin maksimal të të gjithëve në fushën e blertë dhe në shkallët e stadiumit”, shkruan Duka në një postim në faqen e tij në “Facebook”.
“Sonte duhet të fitojë futbolli, nga momenti i këndimit të himneve e deri në vërshëllimën e arbitrit për të mbyllur ndeshjen. Le të tregojmë qytetari, maturi dhe atë që shqiptarët e kanë pasur gjithmonë, mikpritjen”, apelon kreu i FSHF-së.
